物價指數（一）

倫敦唐人街物價指數奇高，大家都應該略有所聞，如果未曾親身幫襯過，好難體會到有幾誇張，所以我特意做了資料搜集，把平時多買的食物及雜貨價錢跟香港超級市場作過比較。事先聲明，部份數字實在很誇張，比定心理凖備，千期唔好嚇親。



貴得最誇張的主要是菜類，老闆話因為新鮮空運，所以價錢一定唔可以平，不過大家都已經知道很多瓜菜都是他們在這𥚃自己種，空運的可能只佔少部份。由於價錢太貴，所以都係盡量少去唐人街為妙，不過當遇上思鄉，或者找不到替代品時，都是避無可避，始終香港人都係「民以食為先」，最多在其他地方慳番。

煮婦生活

時間過得好快，我已經來了倫敦四個月，除了頭一個月因未有安定生活之外，其後三個月斷斷續續已經煮過好多餐飯，基本上都可以稱為一個「家庭煮婦」。作為家庭煮婦並不是我的理想工作，但現在發現原來都好有挑戰性同滿足感，由冇到有、由生到熟、由冇味到好味、由唔似樣到真嘅一樣，過程中都係不停學習及改良，加埋最後比人稱讚好美味仲食到一件都冇剩，嗰種快感真係好正，幾多油煙味、蒜頭味都抵番。

今次我特登揀了九款好喜愛的作品登出來，煎炒煮炸蒸炆燉浸焗燒樣樣有，其中燒肉同熏蹄比我最大滿足感，以前想起燒味只會考慮去邊間買，從未想過自己可以整；另外梅菜扣肉同酥皮湯都係新嘗試，照住做又真係做到。嚟緊我會挑戰醉雞、葡撻及菜肉包，希望一樣成功。

什麼推動我努力去煮呢？其實除了出街食太貴之外，好多時就算到中國餐廰食都未必好味，選擇又唔多，中國人始終最重視就係晚餐，食凍三文治又唔係，食炸魚又唔想，所以都係自己煮算吧。諗番在香港的日子真係好幸福，食物國際化兼多樣化，價錢相宜味道一流，仲有媽媽煮的愛心晚餐，實在太感動，原來晚晚唔駛煮都有得食唔係必然架！